imee danica

Sapsapulenka iti inaldaw
Uray iti sirok ti naslag a bulan
Uray iti tengngat agmatuon
Kabus ken lenned ti bulan
Bayakabak wenno kaarbis ti malem.
Adda no kua saludsod:
Addaka kadi kadagiti rangaw ti bullalayaw
Wenno kadagiti rangaw dagiti bayawas
Wenno kadagiti ellek ni manongmo nga Anib.
Iwagsak no kua ni manongmo dagiti dudukot
Wenno dagiti kuriro dagiti layus
Ken dagiti umay pay a tikag.
Ammok—agur-uray dagiti bangkag
Dagiti tambak ken kinelleng
A pagriakan dagiti tukak
Ngem agdaydayengdeng dagiti sardam
Ken parbangon ti San Lorenzo
Kas kadagiti di mauma a saltek
Agpadpadaan latta kenka
Ngem nangina unayen ti gatas
Ken uray ti bayad dagiti arapaap
Ladingitek ngem narikut ti agpasungad
Iti adayo pay laeng nga isasangbay
Dagiti sangalemto a daniw ti biag.

umel dagiti balikas

Diak no kua maisapar ti agbirok
Kadagiti sugsog nga atap dagiti balikas
A napaksuyan kalpasan ti timmaaw
Nga utoy dagiti naukrit a nakem.
Addan nagan dagiti saem ken anem-em
Kas kadagiti atap a rugso ti sardam
Didan kayat a garien dagiti limmukay
Nga irteng dagiti immatab a rikna.
Sukitsukitem man dagiti tarumamis
Addan nakem dagiti sugat a nagudas
Napasag kadagiti kadaratan ti pangngarig
Diak kayat itan a lagipen dagiti rusod
No umay dagiti ulbod a buteng
Saan laeng a napasag kadagiti aluyo
Saan laeng a nanasanas kadagiti allon
Ketdi, agsublisublida latta a maidaknir
Dagiti allawig a mangsunson latta iti gita
Dagiti atap ken umel itan a balikas
Nga agsagni latta kadagiti nakem
Iti man tarumamis dagiti bambanti
Ken napasag itan a takneng ken tamed.
Saan itan a makagargari ti isem
Saan itan nga isem ti makagargari.
Diak no kua maisapar ti agbirok
Kadagiti sugsog nga atap dagiti balikas
A napaksuyan kalpasan ti timmaaw
Nga utoy dagiti naukrit a tarumpingay.

ISUSUKNAL

Adda murmuray a riingen
Ti sanengseng ti danum
Ti makaturturog a rikna.
Lukagenna dagiti agsusugel
Nga urat ti napipikel
A dapanko a nagbasakbasak
Iti siudad a nagalikumkomak iti angdod
Ken angset dagiti natikagan a namnama
Dagiti agkalkallautang nga ima
Dagiti aglablabunan a tigab ti kinaawan.
Karaykayenda ti penultimo a kinaumel ti rikna
Dagiti naiwalang a sidunget ti basura
Uray ti kinapiman dagiti maitanggaya
A dakulap-- allilawen latta, wen,
Dagiti umsi ti di mangigigir a nakem
A manglabaslabas latta kadagiti anil-il
Ti di makaturog a kalsada ti biag.
Iwagsakko ti kunak dagiti sidunget ti siudad
Ngem sumurotda iti panagsublik iti away
Di magatadan dagiti saludsod nga iburay
Dagiti awanan nagan ken dayaw a rupa
Ti di latta mabaduan a bayanggudaw a saludsod
Dagiti di mapedped a nagan ti bisin ken ud-od.

Napaksuyan Dagiti Dapan Ken Gemgem

awit ti napaksuy a dapan ti kettang
dagiti dagsen ken dagensen ti lubong.
uray la a napukaw dagiti timek
nagrabrabii ti dir-i ken anek-ek
nagkaykaysa dagiti inep ti boses
iti ayala ken paseo de roxas.
naktang dagiti naitag-ay a gemgem
saan a makaem ti sakit ti nakem
uray agsasallupang dagiti maris
ti mabuniagan a krisis ken risiris
awan nailangitan a sakripisio
awan dagiti bimmaba iti trono
nagtalinaed ti dagensen a deggang
ken dagsen ti padeppa ti malakaniang.
immuneg pay dagiti sugat ti nakem
awit latta, wen, ti sanaang ken saem
ti napaksuyan-nautuyan a dapan
iti dagsen ken dagensen a di kimsen
agsasamusam, wen, ti sugat ti ili
anian a babantot a di mailili.


Hulio 21,2005/3pm huebes

Linas (ken ni Anib)

no kairuten dayta siglot ti turog
ummongek dagiti magelgel a mureng
ken uray dagiti waram nga ay-ayam
naisalapay alikuno ta isem.
saggaysaek a bilangen iti baet
dagiti di pay naugasan a sangit
ken nagawangam a bote iti bitek
a nakaurnongan sangalem nga ellek.
adda latta, wen, a maibalballaet
nga ukas-ukasen ti umbi ken irut
dagiti siglotak a linas ti anus
no kasta a sumken ken sumpeg ti ikkis
a kasingin dagiti nakasutsutil
di maanawa nga ibit ken anil-il
sangalsangalem iti ngalay ti malem
sutilsutilem iti angaw ti sardam.
adda latta lagalagaem a linas
iti suli ti nakem—dinto marignas.

hulio 17, 2005
narebisar agosto 2, 2005/1:20pm

alang-ang ti ang-ang

tiempo ita ti sidduker ken alang-ang
daytoy walang nga aso iti langalang
piman, di makalasin iti al-alia
a tirtirisen ti nalidem a rupa
iti tallupulo a pirak ni judas
kasungani ti pito ribu a lais.

tiempo ita ti luksaw a mabuniagan
dagiti gita nga awanan ti nagan
nanggamsaw iti inosente a rikna
nagan a pinilkapilkatan ti dudua
agsagni ti saem dagiti pagarup
naduros a kaunggan a di maragup.

tiempo ita ti nakidem a mulengleng
wenno tinulawan ti mata ti maag
dagiti tarigagay di naidaya
kiniddayan ti umsi ti parpardaya
nakakirkirang man dagiti un-unnoy
a katkatawaan ti kapuy ken lupoy.

tiempo ita ti panagpapasanaang
ti madukal nga am-amangaw ti ang-ang
panagilista ti rituer ti kabusor
ti nagan nga inang-angaw ti dikkumer
guddaken ti apas ken panagipapan
agnunog latta ti mulit iti nagan.



junio 22, 2005
narebisar, hulio 4, 2005

Panagawid 2005

nakadagdagsen man dagiti karton
kas kadagiti daan a karton a binaklayko
idi simmangpetak iti marikina heights idi 1996,
karton met laeng ti bagkatko ita nga agsubliak.
ammok a segseggaannakon dagiti tambak
kadagiti kataltalonan ken waig ken bantay ti san lorenzo.
ngem malasinda pay ngata dagiti dapanko
a tiniltil dagiti pudot ken rugit ken angdod
dagiti kalsada ti siudad, wenno linemmes
dagiti gura ken lunod dagiti layus
ken bagyo ken tudo a naurnong
kadagiti alinggaget ti estero wenno karayan.
ammok nga agur-uray itan ti sirok ti mangga--
a pagpaldagak no kasta a kapigsa ti amian
a mangpunas kadagiti dagaang dagiti lagip.
sumsumga itan dagiti adu a saludsod dagiti bautek
pataguab ken ridaw ken tawa ken saltek
ngem mabatiakto a mangkutkutim kadagiti kablaaw
dagiti kigaw a dayyeng ken ul-ulila a linnaaw
kadagiti nalaylay nga untok ken sabong ti tabako
wenno kadagiti saan a naadas a bawang
agur-uray dagiti palabsek a kuaresma ken kiring
a lallallayen ti kuddot ti alimbasag ti sardam.

Sabado/11:56 am
Mayo 7, 2005
daffodil computer center
malibay, pasay city

agalikuno ti rikna

(sungbat ken Manong Noli)


saan no kua a mapukaw ti lagip
uray napunasen ti dalan a kimmalkalipkip
aguddog latta dagiti ligay ti panawen

kas iti panaglulumba a tumaray dagiti iliw
saan a nagkalubbon ti puso, dimo kad’ nadlaw
ti panagsangpet ken panagpanaw dagiti bulong

ipintam latta dagitoy iti uged wenno tugot
dagiti di aggibus a karayo ken karab-as ni ayat
tiliwen nga ibaut ti ipus ti batombalani

di agkupas dagiti uban wenno isem
di aggibus dagiti agtabon a malem
gargarien ti agal-alintok a singed ken ngayed

ti pintek ken bitek ti kumarkarayo a rikna
a mangtalunton kadagiti siglotam pay nga arem mata
nga ilubbonmo iti pedalam a keddel ti unnoy.

kasla makitkitak ti agbuabubuabo iti sang-atan
wenno tumaptapok nga uges ti pagsalogan
a pagsabatan ti agpa-Nalasin ken agpa-Salbang

kumkummiapet dagiti dapirusem a taptapuyo
iti panagal-al dagiti agal-alikuno nga ungngo
dinto agkupas dagiti tugot nga ibatim iti kadaratan.

Pebrero 20, 2005
4:00 pm/lpi ofis

Sirsirait

nalapgis ken napigis ti ibit
dagiti agtatapaw a gabat
naalli-allin dagiti asug ken ladingit

dagiti nakamuttaleng
a kuddot dagiti rurog
nagkallakallautang

iti duros dagiti nagidday
a lasag dagiti bantay
wenno pagunggan ti baybay

nagrusod dagiti naduros a buteng
kadagiti nakem, naitalimeng
dagiti nagtagisugat a gameng

naruros dagiti katkatawa
naregreg dagiti dawa
narsaak dagiti lua iti lukong ti daga

nagaburan dagiti ladingit
naubun-ubon a sal-it
nagtutuon a rusod, nasirsirait

dagiti dimges a bales
nasusuon ti allawig, kimpes
a nagsublisubli ti buteng, nalmes

naurnong a ganna ken lamina
dagiti umel a sennaay ken tingra
tablo-tablon dagiti dung-aw ti rikna


9:20 pm•enero 24, 2005
lpi ofis

AGADI DAGITI SENNAAY

kuna no kua ni atanud rva:
amponennakami, apo lung-aw
dita lukong ti california
ta adda dita dagiti dung-aw
nga umaymi kalunkonen
kadagiti ginabsuon a malukong
wenno pinggan dagiti iliw-ila-segga
ken sumga a kuddot dagiti lagip.


kunak: diak malabaan dagiti mureng
ti ibit ti nakem nga ikulada
saan nga iti agpatnag, agtawen
dagitoy iti lansad dagiti rikna.
ay, kasapulam ti kloroks, apo lung-aw
pangnawnaw kadagiti annak ti lagip
wenno appoko dagiti umbi ti lallay
a makiang-angaw kadagiti panaas ti berso.

kunam: agsinginan dagiti sugat
a dimo mayindayon iti das-al
ti panawen a mangrapa kadagiti agek
dagiti buridek a rugso, ngem agadi
dagiti sennaay, kadagiti kaunggan,
kadagiti parbangon, sardam man wenno bigat
agtaeng dagiti umel a lua, maidarumudom
kadagiti ulpit dagiti basingkawel ti dalluyon
mamagmagan dagiti maasinan a saiddek
dagiti isem ken karayo ti ili
agur-uray kadagiti panagal-allintok
dagiti garakgak ken katawam.

Enero 14, 2005
rimat ofis--12:07 pm

Mikaela Gloria: Umuna a Villanelle

sapsapulek no kua ti isem ni mikaela gloria
iti nabayadan a patalastas ti telebision
a kasingin ti mangurkuranges a pagilian.

agtagilanga a batibat ti siding ti presidente
iti konsensia ti nangina a bayad ti koriente
sapsapulek no kua ti isem ni mikaela gloria.

diak mananam ti amnaw ti bagas ti malakaniang
a naarasaw iti lunod ti kaldero ti ay-ay
a kasingin ti mangurkuranges a pagilian.

mapanday dagiti ulbod a sao ti allilaw
iti nakem dagiti malinay a bisin ti ili
sapsapulek no kua ti isem ni mikaela gloria.

sangitak dagiti naadas a namnama ti ugaw
a kiraos ti sangasaangan iti agmalem
a kasingin ti mangurkuranges a pagilian.

umay latta dagiti layus, bagyo, tikag ken gawat
ngem mabati a nakamuttaleng dagiti tiri
sapsapulek no kua ti isem ni mikaela gloria
a kasingin ti mangurkuranges a pagilian.


1:56 PM * Enero 13, 2003

Bannawag/Enero 24, 2005


(Dandanin agdua-a-tawen, kunak koma, ti pannakaputarna ti MG: ngem saan pay a naipablaak ta naipasuli kadagiti daan a fileko. Itay laeng malem, nakitak iti gabsuon dagiti naiwara a Bannawag. Ne, in-retypeko ken intedko ken Apo Literary Editor PGP ti Bannawag. Kabayatan nga ur-urayen ti gasatna, in-blogkon. Daytoy ti umuna a putarko a villanelle no makuna man a kasta. Angaw itay ni Apong Cles, "Villanelle kadi daytoy?" Ala, panagblaagenyo man!)