Agur-uray dagiti sardam
itan ta nasursurom ti agbilang
kas idi punganay
adda dagiti sugat
a di aglunit
kas kadagiti tugot
ti kaawanmo a dimo marukod
nagennegenned dagiti saem
dagiti darudar a di nasukal
a dimo mabuniagan
tunggal kuddot dagiti lagip
dimo maikur-it ti anangsab
dagiti mangidus kenka a liday
agur-uray dagiti sabangan
ken eropuerto a pakaitabonan
dagiti bayanggudaw a dapan
agsasalada kadagiti nagkurusan
panpanurnorenda dagiti saem
radradanda dagiti apges
dagiti ling-et a di nagtedted
ken iliw a di mangigigir
addada latta no kua kadagiti baet
dagiti walang ken alang-ang ti nakem
inulila dagiti garampingat a pait
ken ulpit dagiti di marangtayan a kaipapanan
sursuruem latta ti agbilang
kas idi kalman laeng
kas iti kutimermer dagiti niebe
kas iti deggang a tunawen ti kinaawan
di latta manawnaw dagiti iliw
no sumpeg dagiti segga
umay latta dagiti sutil a sanaltek
agur-uray dagiti sardam
9:51 PM• Nobiembre 30, 2004
posted by ANIB @ 6:40 AM
4 Comments:
ayna, abalayan, unay a panagdandaniwen, aya u-uhm. Ala ikkannakam man pay kadagita nagetta a, a pagpampanunotan, he he
joel
isu man, atanud dln!
tira latta a tira ngarud, a! bareng maarisgarak met nga agputar ken agpanablaag iti daniw...
gayyem anib, apayen, dim' met nayonanen dagitoy nakapimpintas a daniwmon a kankanayon a segseggaan? wenno sagsaganaam man 'tay pangpalancamon? ala, gayyem, nagasat a baro a tawenyo a sangapamilia!
ala, adda met sumagmamano a maipanagbaag.
kablaawankayo man ti nagasat nga aldaw dagiti puso.
Post a Comment
<< Home