Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Tuesday, November 16, 2004

Kastoy ti Agdaniw, Tatang (ken ni Anib, kalpasan ti maysa a lallay)

100_4899
Da Anib ken Nanang Imelda

kastoy ti agdaniw, Tatang,
kunam kalpasan a mailallayka
iti sintonado a dayyeng ti bigat.
katkatayam dagiti pangngarig ti tigab
no idusennaka ti um-umlek
nga angaw ken sangit ti bisin.
ay, padiguannak kadagiti liniam a beddal
a mangkagat kadagiti naganus nga umbi
a karinrinnay-aw ti katkatawam.
ap-aprosannak ti anus ti inaldaw a karit
ti sukatsukatek a Wilkins ken Bona
a mailimog kadagiti sangalem
a persona dagiti maugasan
ken mapaburkan a botelia a nagsusuam.
adda ingel ken angseg ti nabsog a pampers
a binalkot ti tiagem a talmeng ti sardam
no al-alaem dagiti agal-alintok
a samiweng kadagiti takiag ni inam.
kiburem no kua dagiti labutab
ti sabon iti palanggana a pakanawnawan
dagiti sab-okmo a katkatawa ken ray-aw
ti di pay maaw-awatan a balikasmo.
agpakleb dagiti agsursuro nga agkaradap
agkarkarayam a lagalagaem a daniw
a nasken a tagibien ti ubing unay a nakemmo.
appupuem, ala, dagiti eksodo ti berso ken dallang
ti ingget atap a bursi ken kari ti masakbayan.



Domingo, Oktubre 30, 2004
alas otso-singkuenta ti bigat


Bannawag, Nobiembre 22, 2004


2 Comments:

At 9:58 PM, Blogger rva said...

makapalagip, atanud, kasla makitkitak ti bagik kenka kadagiti rabii ti panagtiag dagiti sagibsibko nga agsapul iti dede ken lallay. wenno pampers, wen.

ay, kasta laeng ti biag ken daniw ti/iti maysa nga ama, 'tanud...

rva

 
At 6:34 PM, Blogger ANIB said...

wen ngarud, tanud adda daytay imnas ken pannakapnek nga agilaylay iti ubing. adda di mailiwliwag a ragsak ken dungngo aglalo no makitam dagiti inosente a garakgak ken katawa ti ubing.

 

Post a Comment

<< Home