Kastoy ti Agdaniw, Tatang (ken ni Anib, kalpasan ti maysa a lallay)

Da Anib ken Nanang Imelda

kastoy ti agdaniw, Tatang,
kunam kalpasan a mailallayka
iti sintonado a dayyeng ti bigat.
katkatayam dagiti pangngarig ti tigab
no idusennaka ti um-umlek
nga angaw ken sangit ti bisin.
ay, padiguannak kadagiti liniam a beddal
a mangkagat kadagiti naganus nga umbi
a karinrinnay-aw ti katkatawam.
ap-aprosannak ti anus ti inaldaw a karit
ti sukatsukatek a Wilkins ken Bona
a mailimog kadagiti sangalem
a persona dagiti maugasan
ken mapaburkan a botelia a nagsusuam.
adda ingel ken angseg ti nabsog a pampers
a binalkot ti tiagem a talmeng ti sardam
no al-alaem dagiti agal-alintok
a samiweng kadagiti takiag ni inam.
kiburem no kua dagiti labutab
ti sabon iti palanggana a pakanawnawan
dagiti sab-okmo a katkatawa ken ray-aw
ti di pay maaw-awatan a balikasmo.
agpakleb dagiti agsursuro nga agkaradap
agkarkarayam a lagalagaem a daniw
a nasken a tagibien ti ubing unay a nakemmo.
appupuem, ala, dagiti eksodo ti berso ken dallang
ti ingget atap a bursi ken kari ti masakbayan.


Domingo, Oktubre 30, 2004
alas otso-singkuenta ti bigat

Bannawag, Nobiembre 22, 2004