Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Tuesday, November 30, 2004

Agur-uray dagiti sardam

itan ta nasursurom ti agbilang
kas idi punganay

adda dagiti sugat
a di aglunit

kas kadagiti tugot
ti kaawanmo a dimo marukod

nagennegenned dagiti saem
dagiti darudar a di nasukal


a dimo mabuniagan
tunggal kuddot dagiti lagip

dimo maikur-it ti anangsab
dagiti mangidus kenka a liday

agur-uray dagiti sabangan
ken eropuerto a pakaitabonan

dagiti bayanggudaw a dapan
agsasalada kadagiti nagkurusan

panpanurnorenda dagiti saem
radradanda dagiti apges

dagiti ling-et a di nagtedted
ken iliw a di mangigigir

addada latta no kua kadagiti baet
dagiti walang ken alang-ang ti nakem

inulila dagiti garampingat a pait
ken ulpit dagiti di marangtayan a kaipapanan

sursuruem latta ti agbilang
kas idi kalman laeng

kas iti kutimermer dagiti niebe
kas iti deggang a tunawen ti kinaawan

di latta manawnaw dagiti iliw
no sumpeg dagiti segga

umay latta dagiti sutil a sanaltek
agur-uray dagiti sardam

9:51 PM• Nobiembre 30, 2004

Tuesday, November 16, 2004

Kastoy ti Agdaniw, Tatang (ken ni Anib, kalpasan ti maysa a lallay)

100_4899
Da Anib ken Nanang Imelda

kastoy ti agdaniw, Tatang,
kunam kalpasan a mailallayka
iti sintonado a dayyeng ti bigat.
katkatayam dagiti pangngarig ti tigab
no idusennaka ti um-umlek
nga angaw ken sangit ti bisin.
ay, padiguannak kadagiti liniam a beddal
a mangkagat kadagiti naganus nga umbi
a karinrinnay-aw ti katkatawam.
ap-aprosannak ti anus ti inaldaw a karit
ti sukatsukatek a Wilkins ken Bona
a mailimog kadagiti sangalem
a persona dagiti maugasan
ken mapaburkan a botelia a nagsusuam.
adda ingel ken angseg ti nabsog a pampers
a binalkot ti tiagem a talmeng ti sardam
no al-alaem dagiti agal-alintok
a samiweng kadagiti takiag ni inam.
kiburem no kua dagiti labutab
ti sabon iti palanggana a pakanawnawan
dagiti sab-okmo a katkatawa ken ray-aw
ti di pay maaw-awatan a balikasmo.
agpakleb dagiti agsursuro nga agkaradap
agkarkarayam a lagalagaem a daniw
a nasken a tagibien ti ubing unay a nakemmo.
appupuem, ala, dagiti eksodo ti berso ken dallang
ti ingget atap a bursi ken kari ti masakbayan.



Domingo, Oktubre 30, 2004
alas otso-singkuenta ti bigat


Bannawag, Nobiembre 22, 2004