Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Thursday, January 13, 2005

AGADI DAGITI SENNAAY

kuna no kua ni atanud rva:
amponennakami, apo lung-aw
dita lukong ti california
ta adda dita dagiti dung-aw
nga umaymi kalunkonen
kadagiti ginabsuon a malukong
wenno pinggan dagiti iliw-ila-segga
ken sumga a kuddot dagiti lagip.


kunak: diak malabaan dagiti mureng
ti ibit ti nakem nga ikulada
saan nga iti agpatnag, agtawen
dagitoy iti lansad dagiti rikna.
ay, kasapulam ti kloroks, apo lung-aw
pangnawnaw kadagiti annak ti lagip
wenno appoko dagiti umbi ti lallay
a makiang-angaw kadagiti panaas ti berso.

kunam: agsinginan dagiti sugat
a dimo mayindayon iti das-al
ti panawen a mangrapa kadagiti agek
dagiti buridek a rugso, ngem agadi
dagiti sennaay, kadagiti kaunggan,
kadagiti parbangon, sardam man wenno bigat
agtaeng dagiti umel a lua, maidarumudom
kadagiti ulpit dagiti basingkawel ti dalluyon
mamagmagan dagiti maasinan a saiddek
dagiti isem ken karayo ti ili
agur-uray kadagiti panagal-allintok
dagiti garakgak ken katawam.

Enero 14, 2005
rimat ofis--12:07 pm

6 Comments:

At 2:16 AM, Blogger rva said...

ay, wen, mang ariel, no koma ta mabalin ken mabalbalin ta bastarduennakami met latta dagiti agkakalkallong ken mangmangkik iti malakaniang ti sennaay ken paay ditoy ilitayo...

mayat man, atanud, kasla kayatko met ti dumaniw, hehe!

 
At 11:43 AM, Blogger ariel said...

dear dan ken roy:
sungbatakto dagitoy. kadi, a, ta tumarayak pay idiay waikiki, iti conference sitemi. agestoriaakto numuna ta sisiak a leppad ti agongna ditoy a kumperensia. kitaek ti mapa ti kumperensia (tugkelanda iti de-kolor a nagulo a dagum dagiti amin a nasion ket piman ta maymaysa a tugkel ti pinas a naggapuak! anian!) ket agasem ta 40 a pagilian ken 1500 a delegado. siempre, intantan=okto dagiti migrante a mannurat iti hawaii--ken ti interamente nga iluko writing ket agngangada. first question: adda kadi kasta? second question: apay nga ita laeng a mangngegmi? isu, a, pagungtak ida ta datayo ammotayo dagiti literaturada ngem isuda ket maagda kadatayo. it is not fair that is why we need to keep on doing this to the world.

toast now to you both.
we will find a way to keep ICRI together and in this country at that!
manong A

 
At 6:32 PM, Blogger ANIB said...

anian a kinapiman apo lung-aw.
ala,imbag ta adda kayo a mangibanbandos iti iluko lit ken kadagiti pakaseknanna.

mangnamamakami a patinayon latta dagiti arep-epyo (tayo, kuak kom)para iti panagmata ti icri ken dadduma pay a kaaspingna a narugian.

 
At 12:46 AM, Blogger ariel said...

dear dan,
maudi nga aldawmi idi kalman, sunday. kitaen ti waikiki sheraton ken dagiti allon a mangbisong iti diamond head. kitaek dagiti babaknang nga agilad-ilad iti waikiki, kadaratan ken iti beach bed. malagipko ti ilokos, ti davila, ti pagudpu, ti carille, ti lingayen, ti currimao, ti gabu, ti la paz,--adu! kitaek manen ti mapa--maymaysa latta ti naggapu iti pinas ket nalabaga ti naitudok a pin sadiay, daytay kolor ti dara ken lagip. anian!

 
At 9:27 PM, Blogger ANIB said...

ania a pin daydiay daradara apo lung-aw!
agbiagka!
iraraipnakami latta kadagiti lagip ken pakaitan-okan kadagiti pagilian a pagayuyangan dagiti sidingan a dapanyo.

 
At 1:47 AM, Blogger ariel said...

Dear dan,
i carry you all in this soul and memory.
adda met bendision iti yaadayo numan pay...
manong A

 

Post a Comment

<< Home