Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Monday, January 03, 2005

Mikaela Gloria: Umuna a Villanelle

sapsapulek no kua ti isem ni mikaela gloria
iti nabayadan a patalastas ti telebision
a kasingin ti mangurkuranges a pagilian.

agtagilanga a batibat ti siding ti presidente
iti konsensia ti nangina a bayad ti koriente
sapsapulek no kua ti isem ni mikaela gloria.

diak mananam ti amnaw ti bagas ti malakaniang
a naarasaw iti lunod ti kaldero ti ay-ay
a kasingin ti mangurkuranges a pagilian.

mapanday dagiti ulbod a sao ti allilaw
iti nakem dagiti malinay a bisin ti ili
sapsapulek no kua ti isem ni mikaela gloria.

sangitak dagiti naadas a namnama ti ugaw
a kiraos ti sangasaangan iti agmalem
a kasingin ti mangurkuranges a pagilian.

umay latta dagiti layus, bagyo, tikag ken gawat
ngem mabati a nakamuttaleng dagiti tiri
sapsapulek no kua ti isem ni mikaela gloria
a kasingin ti mangurkuranges a pagilian.


1:56 PM * Enero 13, 2003

Bannawag/Enero 24, 2005


(Dandanin agdua-a-tawen, kunak koma, ti pannakaputarna ti MG: ngem saan pay a naipablaak ta naipasuli kadagiti daan a fileko. Itay laeng malem, nakitak iti gabsuon dagiti naiwara a Bannawag. Ne, in-retypeko ken intedko ken Apo Literary Editor PGP ti Bannawag. Kabayatan nga ur-urayen ti gasatna, in-blogkon. Daytoy ti umuna a putarko a villanelle no makuna man a kasta. Angaw itay ni Apong Cles, "Villanelle kadi daytoy?" Ala, panagblaagenyo man!)

7 Comments:

At 11:32 PM, Blogger jim agpalo, jr. said...

mayat...villanelle...sestina koma pay ngarud a!

 
At 5:30 PM, Blogger ariel said...

Hey. apo lung-aw segundo:
mayat ta mayat.
naimbag a gasat ken baro a tawenyo, apo.
manong A

 
At 6:44 PM, Blogger ANIB said...

agyamanak, apo lung-aw; ka jimmy.

nagasat ken nagasgasat latta a baro a tawentayo amin.

agdua a tawen, kunak koma, saan a maysa.

 
At 7:12 PM, Blogger rva said...

mayat man, atanud! aria latta!

mang jim: nagrigat ti sestina, hehe! adda ngarud rinugiak idi ngem nakulkol ti isipko, diak nalpas.

 
At 3:18 PM, Blogger abril said...

ayos toy daniwmo, gayyem anib, dagitoy ti tatak ti disiplinado a mannaniw. ala, tira latta.

 
At 11:14 PM, Blogger asseng said...

mayat angkay.

tapno talaga nga intakderam koman ti kinadisplinadom ket agkakarhyme koma payen dagiti akintengnga a linia.

nupay kasta, agkaramayot latta..

 
At 2:19 PM, Blogger Ariel said...

Hey, anib:
Mabalin a matakaw daytoy para iti maysa a book project?

Merry Christmas, adi!

 

Post a Comment

<< Home