Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Tuesday, January 25, 2005

Sirsirait

nalapgis ken napigis ti ibit
dagiti agtatapaw a gabat
naalli-allin dagiti asug ken ladingit

dagiti nakamuttaleng
a kuddot dagiti rurog
nagkallakallautang

iti duros dagiti nagidday
a lasag dagiti bantay
wenno pagunggan ti baybay

nagrusod dagiti naduros a buteng
kadagiti nakem, naitalimeng
dagiti nagtagisugat a gameng

naruros dagiti katkatawa
naregreg dagiti dawa
narsaak dagiti lua iti lukong ti daga

nagaburan dagiti ladingit
naubun-ubon a sal-it
nagtutuon a rusod, nasirsirait

dagiti dimges a bales
nasusuon ti allawig, kimpes
a nagsublisubli ti buteng, nalmes

naurnong a ganna ken lamina
dagiti umel a sennaay ken tingra
tablo-tablon dagiti dung-aw ti rikna


9:20 pm•enero 24, 2005
lpi ofis

8 Comments:

At 7:15 PM, Blogger rva said...

nabileg ti duayyan' didigra ken dung-aw ti ames itoy a daniwmo, atanud! makapasidduker a tagilanga ti layus, reggaay ken aluyo...

 
At 12:03 AM, Blogger asseng said...

yammon?

 
At 8:21 PM, Blogger ANIB said...

adda dakdakkel a didigra a kagubgubalko ita, atanud.
diak pay ketdin makasurat gapu iti daytoy.
kunada man a no umay, agnanaay, awan sarday.

kunkunak man, nakatulongak la ngaruden,
siak pay ti maikuspil,malipatan, di masubadan.
no koma pinatpatik ti tanudta a miks
a diak kuykuyogen ti awan ti kuartana
awan koma ita daytoy a pakarikutan.
ngem sapay ta malasatto dagitoy a pakarigatan.

 
At 1:18 PM, Blogger ariel said...

naliday dagiti balikasmo, gayyem lung-aw. a ngem sinno koma ti mannaniw a di naliday?
ikkam latta ngarud tapno no makasursurokami, ala.
manong A

 
At 4:17 PM, Blogger asseng said...

mustakan? ala agan-anuska ta kas tay daniw ni apong cles, agsabongto ti kawayan, hehe.

aniat madamag?

 
At 6:33 PM, Blogger ANIB said...

agyamanak unay, apo lung-aw. nabayag pay ketdin a diak simmarungkar ditoy.

makumikomak unay ken ni anib--kasapulanna ti 24 oras a panangilili. numuna ta agsasamusam ti panateng kada uyekna. sa pay la nakadagdagaang ditoy malibay.

awan metten daydi dawdawatek about panagregreg dagiti niebe, apo lung-aw.

ala, no diyo pay masango, please, isamirayonto no da wayayo.

ken asseng; yapuran ti mamarbangon a dumaniw tapno nabaludbod ni asseng anibmo, hehehe.

 
At 9:08 PM, Blogger asseng said...

daniw ti sardam ti nasamay sa, hehe.

 
At 10:32 PM, Blogger rva said...

nasamsamay sa ket daytay dallang iti parbangon. natangtangken. natangtangkenan.

 

Post a Comment

<< Home