Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Friday, May 06, 2005

Panagawid 2005

nakadagdagsen man dagiti karton
kas kadagiti daan a karton a binaklayko
idi simmangpetak iti marikina heights idi 1996,
karton met laeng ti bagkatko ita nga agsubliak.
ammok a segseggaannakon dagiti tambak
kadagiti kataltalonan ken waig ken bantay ti san lorenzo.
ngem malasinda pay ngata dagiti dapanko
a tiniltil dagiti pudot ken rugit ken angdod
dagiti kalsada ti siudad, wenno linemmes
dagiti gura ken lunod dagiti layus
ken bagyo ken tudo a naurnong
kadagiti alinggaget ti estero wenno karayan.
ammok nga agur-uray itan ti sirok ti mangga--
a pagpaldagak no kasta a kapigsa ti amian
a mangpunas kadagiti dagaang dagiti lagip.
sumsumga itan dagiti adu a saludsod dagiti bautek
pataguab ken ridaw ken tawa ken saltek
ngem mabatiakto a mangkutkutim kadagiti kablaaw
dagiti kigaw a dayyeng ken ul-ulila a linnaaw
kadagiti nalaylay nga untok ken sabong ti tabako
wenno kadagiti saan a naadas a bawang
agur-uray dagiti palabsek a kuaresma ken kiring
a lallallayen ti kuddot ti alimbasag ti sardam.

Sabado/11:56 am
Mayo 7, 2005
daffodil computer center
malibay, pasay city

6 Comments:

At 11:28 PM, Blogger jim agpalo, jr. said...

makapasennaay...ngem yotnina, ania ngarud...suratemton a, a sarita ta isuda met ti saksi kadagiti tugotmo...

good luck!

 
At 4:41 AM, Blogger rva said...

anian, atanud, makapalagip la unay!

adda met kasta a panagawid a kapadasak ken napadasak idi ket maymaysa a lugar nge isu met la dayta marikina...

 
At 10:38 PM, Blogger asseng said...

kas met la dikan agsublit manila, angkay. irimattanto daytoyen a.

naawatmo kadi textko? pumasiarkanto ditoy no sabado a, mayo 14, alas tres ti malem.

naglateg ti putotko(nto), hehe.

 
At 10:39 PM, Blogger asseng said...

wen gayam, nagkartonak metten ta umakarkami dita holy spirit, qc., naul-ulimek bassit.

 
At 10:10 AM, Blogger abril said...

gayyem anib, talaga a kasta, adda babassit nga exodus a dumteng iti biag, adda panawen ti ipapanaw ken panagsubli...ngem tay kunada agtuloy latta ti biag, di kadi?

asseng, congrats ta sagibom, ala, nayonam pay tapno umadu ti puli ni mannurat!

 
At 10:47 PM, Blogger ariel said...

ala, ading, ditay mamingga nga agdarepdep.

 

Post a Comment

<< Home