Anib ti Nakem

Gupgop dagiti ir-iruken ti nakem, ir-iriken ti rikna --an-anib dagiti agal-alintok ken agkatangkatang a parmata

Tuesday, January 25, 2005

Sirsirait

nalapgis ken napigis ti ibit
dagiti agtatapaw a gabat
naalli-allin dagiti asug ken ladingit

dagiti nakamuttaleng
a kuddot dagiti rurog
nagkallakallautang

iti duros dagiti nagidday
a lasag dagiti bantay
wenno pagunggan ti baybay

nagrusod dagiti naduros a buteng
kadagiti nakem, naitalimeng
dagiti nagtagisugat a gameng

naruros dagiti katkatawa
naregreg dagiti dawa
narsaak dagiti lua iti lukong ti daga

nagaburan dagiti ladingit
naubun-ubon a sal-it
nagtutuon a rusod, nasirsirait

dagiti dimges a bales
nasusuon ti allawig, kimpes
a nagsublisubli ti buteng, nalmes

naurnong a ganna ken lamina
dagiti umel a sennaay ken tingra
tablo-tablon dagiti dung-aw ti rikna


9:20 pmā€¢enero 24, 2005
lpi ofis

Thursday, January 13, 2005

AGADI DAGITI SENNAAY

kuna no kua ni atanud rva:
amponennakami, apo lung-aw
dita lukong ti california
ta adda dita dagiti dung-aw
nga umaymi kalunkonen
kadagiti ginabsuon a malukong
wenno pinggan dagiti iliw-ila-segga
ken sumga a kuddot dagiti lagip.


kunak: diak malabaan dagiti mureng
ti ibit ti nakem nga ikulada
saan nga iti agpatnag, agtawen
dagitoy iti lansad dagiti rikna.
ay, kasapulam ti kloroks, apo lung-aw
pangnawnaw kadagiti annak ti lagip
wenno appoko dagiti umbi ti lallay
a makiang-angaw kadagiti panaas ti berso.

kunam: agsinginan dagiti sugat
a dimo mayindayon iti das-al
ti panawen a mangrapa kadagiti agek
dagiti buridek a rugso, ngem agadi
dagiti sennaay, kadagiti kaunggan,
kadagiti parbangon, sardam man wenno bigat
agtaeng dagiti umel a lua, maidarumudom
kadagiti ulpit dagiti basingkawel ti dalluyon
mamagmagan dagiti maasinan a saiddek
dagiti isem ken karayo ti ili
agur-uray kadagiti panagal-allintok
dagiti garakgak ken katawam.

Enero 14, 2005
rimat ofis--12:07 pm

Monday, January 03, 2005

Mikaela Gloria: Umuna a Villanelle

sapsapulek no kua ti isem ni mikaela gloria
iti nabayadan a patalastas ti telebision
a kasingin ti mangurkuranges a pagilian.

agtagilanga a batibat ti siding ti presidente
iti konsensia ti nangina a bayad ti koriente
sapsapulek no kua ti isem ni mikaela gloria.

diak mananam ti amnaw ti bagas ti malakaniang
a naarasaw iti lunod ti kaldero ti ay-ay
a kasingin ti mangurkuranges a pagilian.

mapanday dagiti ulbod a sao ti allilaw
iti nakem dagiti malinay a bisin ti ili
sapsapulek no kua ti isem ni mikaela gloria.

sangitak dagiti naadas a namnama ti ugaw
a kiraos ti sangasaangan iti agmalem
a kasingin ti mangurkuranges a pagilian.

umay latta dagiti layus, bagyo, tikag ken gawat
ngem mabati a nakamuttaleng dagiti tiri
sapsapulek no kua ti isem ni mikaela gloria
a kasingin ti mangurkuranges a pagilian.


1:56 PM * Enero 13, 2003

Bannawag/Enero 24, 2005


(Dandanin agdua-a-tawen, kunak koma, ti pannakaputarna ti MG: ngem saan pay a naipablaak ta naipasuli kadagiti daan a fileko. Itay laeng malem, nakitak iti gabsuon dagiti naiwara a Bannawag. Ne, in-retypeko ken intedko ken Apo Literary Editor PGP ti Bannawag. Kabayatan nga ur-urayen ti gasatna, in-blogkon. Daytoy ti umuna a putarko a villanelle no makuna man a kasta. Angaw itay ni Apong Cles, "Villanelle kadi daytoy?" Ala, panagblaagenyo man!)